უშიშროების ყოფილი მინისტრი ბოლო პერიოდში სამხედრო პირების გააქტიურებას რევოლუციის სცენარისთვის შესაძლო მზადებას უკავშირებს.
ირაკლი ბათიაშვილი მოუწოდებს სამოქალაქო საზოგადოებას და „ნაციონალურ მოძრაობის" წევრებსაც, არ დაუშვან მოვლენების მსგავსი განვითარება.
„გულუბრყვილობაა ვიფიქროთ, რომ ამ კონკრეტულ კამპანიას აქვს მხოლოდ საარჩევნო მიზანი. დიდი გულუბრყვილობაა ვიფიქროთ, რომ ამის მიზანი მხოლოდ ის არის, რომ პოლიციელთა და ჯარის დიდმა ნაწილმა ხმა არ მისცეს სალომე ზურაბიშვილს და მეტი ხმები წამოვიდეს „ნაციონალური მოძრაობის" კანდიდატის მხარეს. რა თქმა უნდა, მთლიანობაში ეს არცთუ მცირე კონტინგენტია, მაგრამ შეიარაღებული ძალები რომ ავიღოთ, გლდანის რამდენიმე უბანი ელექტორალური თვალსაზრისით უფრო მეტია. ნუ გვეგონება, რომ ამას მათთვის მნიშვნელობა აქვს. ამას გაცილებით შორს მიმავალი მიზანი აქვს, ეს არის ფარული მზადება, რომელიც ახლა მიმდინარეობს ე.წ ახალი რევოლუციისათვის",-განაცხადა ირაკლი ბათიაშვილმა ჟურნალისტებთან საუბრისას.
ბათიაშვილი განმარტავს, რომ „ნაციონალური მოძრაობის" გააქტიურების შესახებ ინფორმაცია სხვადასხვა ძალოვანი უწყებებიდან აქვს. ის იმედს იტოვებს, რომ სახელმწიფო სტრუქტურები ამ პროცესებს თვალყურს ადევნებენ და შესაბამის პრევენციულ ღონისძიებებს გაატარებენ.
