უცნაური შეგრძნებები და ,,პროპაგანდისტული ვარჯიში" – რუსეთის საგარეო უწყება ბახტაძის გამოსვლას გამოეხმაურა


     რუსეთის საგარეო უწყება საქართველოს პრემიერ–მინისტრის გაეროში სიტყვით გამოსვლას გამოეხმაურა.

     რუსეთის საგარეო უწყებაში აღნიშნავენ, რომ თბილისის სამშვიდობო ინიციატივა განისაზღვრება არა მოსკოვის დამოკიდებულებით, არამედ იმით, თუ როგორ აღიქვამენ მას სოხუმსა და ცხინვალში.
 
     „ყურადღება მივაქციეთ საქართველის მთავრობის ხელმძღვანელის მამუკა ბახტაძის გამოსვლას გაერო-ს გენერალურ ასამბლეაში, სადაც მან რუსეთს მოუწოდა, ხელი არ შეუშალოს აფხაზეთისა და სამხრეთ ოსეთის მიმართ რაღაც „ახალი სამშვიდობო" ინიციატივის განხორციელებას. გამოსვლამ დატოვა უცნაური შეგრძნებები. როგორც ვხედავთ, მსოფლიო საზოგადოებას კვლავ შთააგონებენ რეალობისგან უსასრულოდ დაშორებულ წარმოდგენას, რომ რესპუბლიკების მოსახლეობა დიდი ხანია, სიხარულით დაბრუნდებოდა საქართველოს შემადგენლობაში, რომ არა „რუსი ოკუპანტები". ვიმედოვნებთ, რომ თავად ქართველი პოლიტიკოსები, პროპაგანდისტული ვარჯიშისგან თავისუფალ დროს მაინც, აცნობიერებენ რეალურ მდგომარეობას.

     როგორც ცნობილია, რუსეთი დიდი ხანია, მოუწოდებს საქართველოს, დაიწყოს ურთიერთპატივისცემაზე დაფუძნებული დიალოგი აფხაზეთთან და სამხრეთ ოსეთთან. უმჯობესია, ქართულმა მხარემ გამოიყენოს შესაძლებლობა, მოყვეს თავისი შეთავაზებების შესახებ ჟენევის დისკუსიებზე, რომელსაც, გაერო-სგან განსხვავებით, ესწრებიან ამ რესპუბლიკების წარმომადგენლები. ჯერ ასეთ შესაძლებლობას თბილისი უგულვებელყოფს", -ნათქვამია რუსეთის საგარეო საქმეთა სამინისტროს განცხადებაში.

     მამუკა ბახტაძემ რუსეთის ფედერაციას მოუწოდა, შეასრულოს ნაკისრი საერთაშორისო   ვალდებულებები და გაიყვანოს ჯარები საქართველოს ტერიტორიიდან.
скачать dle 11.0фильмы бесплатно