ჩვენს თანაგუნდელებთან მაქსიმალურად რბილი და მოზომილი მიდგომით ვმუშაობთ, – ამის შესახებ პარლამენტის თავმჯდომარე ირაკლი კობახიძე ჟურნალისტებს გუნდში არსებულ ვითარებასთან დაკავშირებით განუცხადა.
მისი თქმით, სირთულეების მოგვარების საუკეთესო გზა საუბარია.
„ჩვენ შარშან ამ დროს ამაზე მეტი სირთულეები გვქონდა, თუმცა მაშინ მოგვარება მოვახერხეთ. ამის ერთადერთი და საუკეთესო გზა არის საუბარი, რისთვისაც მზად ვართ. მაქსიმალურად რბილი და მოზომილი მიდგომით ვმუშაობთ ჩვენს თანაგუნდელებთან. თუ სადმე არის სირთულე და პრობლემა ამაზე უნდა ვისაუბროთ და ამის საფუძველზე გადაიჭრას პრობლემები. ამისთვის დღესაც მზად ვართ", – განაცხადა კობახიძემ.
„რაც უფრო ეფექტიანი იქნება ფორმატი, მით უკეთესი. შეიძლება, ეს იყოს უმრავლესობა, ფრაქცია, ერთი ერთზე საუბარი, ნებისმიერ ფორმატში მზად ვართ დისკუსიისთვის, რათა გადაიჭრას პრობლემები მთავარია გუნდურობის პრინციპი იყოს დაცული. ვნახეთ, რომ ეს პრინციპი შარშან ამ დროსაც დარღვეული იყო სხვადასხვა დეპუტატის მიერ, მაგრამ მაშინ მოვახერხეთ პრობლემების გადაჭრა, დღესაც ვხედავთ, რომ ირღვევა გუნდურობის პრინციპები, თუმცა ვფიქრობ, აქაც შევძლებთ მოგვარებას", – განაცხადა პარლამენტის თავმჯდომარემ.
მან კონკრეტული გვარების დასახელებისგან თავი შეიკავა და აღნიშნა, რომ რამდენიმე დეპუტატის მიერ ინფორმაცია არასწორად იყო გამოტანილი.
„კონკრეტულ გვარებზე საუბარი არ მინდა. იყო რამდენიმე განცხადება სხვადასხვა დეპუტატის მხრიდან, სადაც მაგალითად ტყუილი ითქვა, არასწორად გამოიტანეს ინფორმაცია, ყვებოდნენ რა ხდებოდა კონკრეტულ შეხვედრებზე. რეალურად კი, ტყუილი ითქვა, რაც წესების დარღვევაა", – აღნიშნა ირაკლი კობახიძემ.
„შარშანაც იყო კონკრეტული სირთულეები და პრობლემები, მათ შორის გახსოვთ, რომ მაშინ იქნა მიღებული კონკრეტული გადაწყვეტილებები პოლიტსაბჭოსთან დაკავშირებითაც. კონკრეტული დეპუტატები აღმოჩნდნენ პოლიტსაბჭოს მიღმა სწორედ იმის გამო, რომ გარკვეული წესები დაარღვიეს. დღეს გვაქვს იგივე მოცემულობა, სასამართლოსთან არც მაშინ იყო და არც დღეს არის კავშირში ეს ყველაფერი, რაც უმრავლესობის შიგნით ხდება. პრობლემები რთული არ არის და მოგვარებადია", – განუცხადა პარლამენტის თავმჯდომარე ირაკლი კობახიძემ ჟურნალისტებს.
