დიდი ბრიტანეთის მხრიდან ორი ქართველი მოსამართლისთვის სანქციების დაწესების საკითხს ოპოზიციურ სპექტრში ეხმაურებიან.

     "ერთიანობა-ნაციონალური მოძრაობის" თავმჯდომარის, თინა ბოკუჩავას განცხადებით, ბრიტანეთის მხრიდან მოსამართლეებზე სანქციების დაწესება მნიშვნელოვანი განაცხადია.

     როგორც ბოკუჩავა აღნიშნავს, სანქციების გაფართოებას მოელიან.

     "ბრიტანეთის მხრიდან სანქციების დაწესება ჩინჩალაძე-მურუსიძეზე ძალიან მნიშვნელოვანი განაცხადია. ჩვენ დიდი ხანია ვსაუბრობთ სანქციებზე ბრიტანეთის მხრიდან, დიდი ხანია ვმუშაობთ ამ თემაზე და უახლოეს მომავალში, დიდი ალბათობით, სანქციები გაფართოვდება. ბრიტანეთი ძალიან მაღალი მტკიცების ხარისხსა და სტანდარტს იყენებს იმისთვის, რომ დააკისროს ფინანსური სანქციები", - განაცხადა თინა ბოკუჩავამ.

     პარტია "ლელო - ძლიერი საქართველოს" საერთაშორისო მდივნის, გრიგოლ გეგელიას განცხადებით, გაერთიანებული სამეფო არის კარგად ინფორმირებული მხარე, ამიტომ ღრმად არის დარწმუნებული, რომ ის მოახერხებს პროცესში ყველა საჭირო ზომის მიღებას.

     "ამ მოცემულობაში, ბრიტანეთის სანქციები არის კორუფციის ნიშნით და კორუფციის მუხლით. ასეთ რამ ხდება მაშინ, როდესაც ამა თუ იმ სახელმწიფოს აქვს მყარი მოსაზრება, რომ მისი აზრით, ესა თუ ის პირი, თუ პირთა ჯგუფი არის ჩართული არაგამჭვირვალე ფინანსურ ტრანზაქციებში. გაერთიანებული სამეფო არის კარგად ინფორმირებული მხარე, ამიტომ ღრმად ვარ დარწმუნებული, რომ როგორღაც გაერთიანებული სამეფო მოახერხებს, ჩვენი ჩართულობის გარეშე, ყველა შესაბამისი ზომის მიღებას, რაც არის აუცილებელი", - განაცხადა გრიგოლ გეგელიამ.

წყარო: https://rustavi2.ge/ka/news/310534