„ქართულ ოცნებას" მედიის თავისუფლების შეზღუდვას აბრალებს პოლიტიკური ძალა, რომელმაც მოროდიორივით მიითვისა ტელეკომპანია „იმედი,"– ამის შესახებ დედაქალაქის მერმა და „ქართული ოცნების" გენერალური მდივანმა კახა კალაძემ „ომეგა ჯგუფის" ირგვლივ განვითარებულ მოვლენებზე საუბრისას განაცხადა.
კალაძის თქმით, კომპანიის ხელმძღვანელი მიხეილ სააკაშვილს შეეკრა და ცდილობს, არ გადაიხადოს დაგროვილი დავალიანება.
პარტიის გენერალურმა მდივანმა საზოგადოებას „ქართული ოცნების" ხელისუფლებაში ყოფნის 6 წლის თავზე ანგარიში წარუდგინა.
„ამ კამპანიის მიზანი, ერთი მხრივ, ბიუჯეტის კუთვნილი 50 მილიონის, ანუ ხალხის კუთვნილი ფულის გადაუხდელობა და, მეორე მხრივ, ხელისუფლების იმიჯის შელახვაა.
"საზოგადოებას უნდა ახსოვდეს, რომ „ომეგას" ბიზნესი გაანადგურა სააკაშვილმა, მან ქვეყნიდან განდევნა მისი დამფუძნებელი და პირველს სწორედ მას წაართვა ტელევიზია. ეს ბიზნესი და ტელევიზია ჩვენი ხელისუფლების დამსახურებით დაუბრუნდა მფლობელს და დღეს ეს ადამიანი, რომელმაც 50-მილიონიანი დავალიანება დააგროვა ბიუჯეტის წინაშე, თავის ყოფილ ჯალათს – სააკაშვილს შეეკრა და გაუგებარი ჩანაწერებით ცდილობს თავი აარიდოს ხალხის კუთვნილი ფულის გადახდას, ფარად კი ამ საქმეში ტელეკომპანიას იყენებს. „ქართულ ოცნებას" მედიის თავისუფლების შეზღუდვას აბრალებს პოლიტიკური ძალა, რომელმაც ძალადობით მიისაკუთრა ტელეკომპანია „რუსთავი 2", რომელმაც მოროდიორივით მიითვისა ტელეკომპანია „იმედი".
დღეს ყველა ხედავს, თუ რამდენად თავისუფალია მედიაგარემო საქართველოში.
უსუსური ე.წ. ჩანაწერებით „ქართულ ოცნებას" ბიზნესზე ზეწოლას აბრალებს კრიმინალური პოლიტიკური ძალა, რომლისთვისაც ბიზნესის რეკეტი, ბიზნესმენების შანტაჟი და დაშინება, ქონების მიტაცება ყოველდღიური მოვლენა იყო. სრული პასუხისმგებლობით ვაცხადებთ, რომ არ არსებობს ბიზნესზე პოლიტიკური ზეწოლის არც ერთი შემთხვევა და შესაბამისად, ვერავინ წარმოადგენს ამგვარი ფაქტის ვერც ერთ მტკიცებულებას. ყოველივე ზემოაღნიშნულის გათვალისწინებით, „ნაციონალური მოძრაობის" და მისი მედიასაშუალებების უსუსური მცდელობა, განახორციელონ „ქართული ოცნების" დისკრედიტაცია, წარუმატებლობისთვის არის განწირული”, – აღნიშნა კახა კალაძემ.
